.

Thursday, December 20, 2007

Monday, September 17, 2007

இனிமேல் இங்கே எழுதப்போவதில்லை.

பதிவர்கள் விலகுவதும் விலகியவர்கள் உள்ளே வருவதும் சகஜமாயிருக்கும் இந்த நாட்களில் நானும் ஒரு அறிவிப்போடு இங்க எழுதுறத நிறுத்தப் போறேன். இதுக்கு மேல பில்ட் அப் குடுக்க விரும்பல தனிக்குடித்தனமா போயி cyrilalex.com தளத்துல எழுதலாம்னு இருக்கேன். உங்க ஆசியோட!
எல்லாரும் புதுவீடு புகுவிழாவுக்கு வந்திடுங்க.

என்னுடைய பதிவுகள் சிலவற்றை ஒன்றாக ஒரே தளத்தில் காணும் வசதியை விரைவில் ஏற்படுத்தவிருக்கிறேன்.

பதிவுகளுக்கான புதிய செய்தியோடை : http://cyrilalex.com/?feed=rss2
பின்னூட்டங்களுக்கான புதிய செய்தொயோடை : http://cyrilalex.com/?feed=comments-rss2

அடுத்த பதிவு எப்ப போடுவேன்னு தெரியாது. ஆணியப் புடுங்க சொன்னா பரவாயில்ல இங்க ஆபீஸ்ல சுத்தியலையே புடுங்க சொல்றாங்கப்பா.

தள வடிவமைப்பு சிந்தாநதியும், ரவுசங்கரும் சற்றுமுன்னுக்கு செய்ததிலிருந்து சிறிய முன்னேற்றங்களுடன் நான் ஆக்கியது. தேன், அலைகள் பாறைகள் மணல்மேடுகளுக்கான லோகோ நானே செய்தது. இதுக்கெல்லாம் வீட்ல ஸ்பெஷல் பெர்மிஷன் வாங்கிட்டேன்.

மறக்காம உங்க கருத்துக்கள சொல்லுங்க.

Wednesday, September 05, 2007

தமிழில் வார்த்தைகள் எத்தனை லட்சம்?

என் மகனுக்கு தமிழ் சொல்லித் தரலாம் என ஒரு புத்தகம் இந்தியாவிலிருந்து வாங்கி வந்தேன். அதுல என்னண்ணா...படம் பார்த்து புரிந்து கொள்ளுங்கள்.

ட - டயர்
வ - வல்கனைசிங்

ஐ - ஐஸ்கிரீம்
ப - பலூடா

ஏ - ஏரோபிளேன்
ஓ - ஓம்னி பஸ்
கலர் கிளி
கறுப்பு வெள்ளை காகம்
வான்கோழி பிரியாணி சாப்பிட்டதில்லையா இவரு?

Tuesday, September 04, 2007

'சற்றுமுன்' புதுப் பொலிவுடன்

சற்றுமுன் செய்தித் தளம் புதுப் பொலிவுடன் satrumun.com எனும் தனி வலைப்பதிவுத் தளமாக இன்றுமுதல் இயங்குகிறது. புதிய தளத்தில் உங்களுக்கென பயனர் கணக்கை துவங்கிய பின்னர் பின்னூட்டமிடும் வசதிகள் உள்ளன.

தமிழ்மணம் புதிய தளத்தை திரட்டுவதில் தாமதம் இருப்பதால் தமிழ்மணப் பயனர்கள் நேரடியாக satrumun.com சென்று செய்திகளைப் பெறலாம்.

Monday, August 20, 2007

'ஜன கன மன' வாத்திய இசை

சர்வேசனின் ஜன கன மன நேயர் விருப்பத்திற்கு என்னுடைய Casioவில் வாசித்து பதித்த வாத்திய இசை.

Get this widget | Share | Track details

Saturday, August 11, 2007

Rush Hour 3 - No rush

அமெரிக்கத் திரையரங்கில் சிவாஜிக்கு அடுத்தபடியாக வரிசையில் நின்று பார்த்தபடம் ரஷ் ஹவ்ர் 3. படத்தில் கதை எனப் பெரிதாய் ஒன்றுமில்லை. எதிர்பாராத திருப்பங்களுமில்லை. வழக்கமாக ஜாக்கிசான் படங்களுக்கு் ரூம் போட்டு கதை எழுதும் பழக்கமில்லை எனத் தெரியுமென்பதால் இதில் பிரச்சனையில்லை. ஆனா் படத்தில் பழைய ஜாக்கிசான் இல்லவே இல்லை. பழசான ஜாக்கிதான் இருக்கிறார்.

சண்டைக்காட்சிகள் மிகவும் சாதாரணமானதாயுள்ளன. அவ்வப்போது வெடிக்கிறது க்ரிஸ்டக்கரின் காமெடி. சிவாஜிக்கும் ரஷ் அவர் 3க்கும் சிவாஜிக்கும் அப்படி ஒரு ஒற்றுமை(வரிசையில் நிற்பதை் தவிர்த்து).

வயதான ஹீரோக்கள். பழக்கப்பட்ட கதை. காமெடியனின் அதீத ஆதிக்கம். ஹீரோவே காமெடியனாவது. அங்கவை சங்கவைபோல இனம்சார்ந்த கிண்டல்கள். இன்னும் பல.

இனம்சார்ந்த கிண்டல்களுக்கு அமெரிகாவில் எதிர்வினைகள் அதிகம் இருப்பதில்லை. இங்கே ஈர்க்குச்சி விளக்குமாறு இல்லாததால்கூட இருக்கலாம்.

படம் காமெடி கலாட்டா. ஏனோ, ஜாக்கியின் பழைய படங்களை பார்க்கவேண்டும் என்கிற ஏக்கத்தை தவிற வேறெதுவும் தாக்கமில்லை.

பழைய ஜாக்கி சான் படத்தொகுப்பு

Wednesday, August 08, 2007

'சற்றுமுன்...'் மின்னஞ்சல் சேவை

சற்றுமுன் செய்தித் தளம் ஒரு மின்னஞ்சல் சேவையை செய்துவருகிறது. உங்கள் மின்னஞ்சல் முகவரியைத் தந்தால் சற்றுமுன் செய்திகள் தினம் காலை (இந்திய நேரம்) உங்கள் மின்னஞ்சல் முகவரிக்கு வந்து சேரும்.

சற்றுமுன் தளத்தின் இடதுபக்கப் பட்டையில் இதற்கான குறும்பெட்டி ஒன்றுள்ளது. இதில் உங்கள் மின்னஞ்சல் முகவரியைத் தந்து சேவையைப் பெறுங்கள். உங்கள் நண்பர்களுக்கும் வீட்டில் உள்ளவர்களுக்கும் அறிமுகப் படுத்துங்கள்.

ஏற்கனவே 70 பேர் இதில் கலந்து பயன்பெறுகிறார்கள். தேன் பதிவின் இடப்பக்கத்திலும் இதற்கான குறும்பெட்டியைக் காணலாம்.

தமிழ் செய்திகளை மின்னஞ்சல் மூலம் வழங்கும் ஒரே சேவை சற்றுமுன்னாகத்தான் இருக்கும் என நினைக்கிறேன். (இல்ல இது ரெம்ப டூ மச்சா?:)))

Tuesday, August 07, 2007

பட்டறையில் பங்குகொள்ளாததன் சோகங்கள்

தமிழ் பதிவர் பட்டறை எந்த அளவு வெற்றி பெற்றுள்ளது என்பதை அதை குறித்த பதிவுகள் செய்திகள் மூலம் தெரிந்துகொள்ள இயல்கிறது. நண்பர்கள் அனைவருக்கும் வாழ்த்துக்கள். என்னால் பங்களிக்க இயலவில்லையே எனும் ஏக்கம் இப்போதைக்குப் போகாது. தமிழ் இலக்கிய வட்டம் போல பதிவர் வட்டம் என ஒன்று தெளிவாக உருவாகியுள்ளதன் வெளி அடையாளமாக இந்தப் பட்டறையை எடுத்துக்கொள்ளலாம்.

இந்த வட்டத்தில் நானும் இருக்கிறேன் என்பதில் பெரும் மகிழ்ச்சி. பட்டறையில் கலந்துகொண்டவர்கள் துவங்கியிருக்கும் பதிவுகளைப் பார்க்கையில் இன்னும் இந்த வட்டம் விரிந்து இணையத் தமிழ் சிறப்படையச் செய்யும் என்பது தெளிவாகிறது.

வேலைப் பழு அதிகமாயிருப்பதால் பதிவுலகில் கவனமில்லை. மொத்தம் 3 ப்ராஜக்ட்களில் வேலைசெய்துகொண்டிருக்கிறேன்... கூடவே ஆஃப்ஷோர் வேறு. (எவனோ கண்ணு போட்டுட்டான்).

மீதமிருக்கும் பதிவுலக வேலைகள்
1. சற்றுமுன் போட்டி முடிவுகளை அறிவிப்பது
2. சற்றுமுன்னை விரிவு செய்து புதுப்பிப்பது
3. புதிய குழுப் பதிவு ஒன்றை ஆரம்பிப்பது (சர்ப்ரைஸ்)
4. சிகாகோவில் பட்டறை நடத்துவது குறித்து திட்டமிடுவது

எப்ப செய்வேனோ தெரியல.

நம்ம பட்டறையில் பட்டையை கிளப்பிய அனைத்து பதிவர்களுக்கும் மனமார்ந்த வாழ்த்துக்களும் பாராட்டும். ஊடகங்களுக்கும், மக்களுக்கும் நம் இருப்பினை வெளிச்சம் போட்டு காட்டியது உங்கள் உழைப்பு. இன்னும் தொடர்வோம்...

Thursday, August 02, 2007

பட்டறைக்கு தோள் கொடுப்போம்

பதிவர் பட்டறைக்காக பல தோழர்கள் கடுமையாக உழைக்கின்றனர். இதன் பலன்களை நாம் அனைவரும் அனுபவிக்கப் போவது உறுதி.

இல்லையென்றே ஆனாலும், பதிவர் பட்டறைக்கு நம் ஆதரவைத் தெரிவிக்க பதிவுலகைச் சாராத வெளி ஆதரவாளர்களின் தளங்களின் சுட்டியை உங்கள் பதிவுகளில் தரலாம், அவற்றைச் சென்று பார்வையிடலாம். இதனால் தற்போதைய ஆதரவாளர்கள் நிறைவு கொள்ளவும் நாளைய நிகழ்வுகளுக்கு ஆதரவு திரட்டவும் இயலும்.





Monday, July 30, 2007

மைதாஸ் - திண்ணையில் வந்த சிறுகதை

மைக்கேல் தாஸ் பங்களாவிலிருந்து வெளிவந்தார் ஜேசுராஜன். 'இங்கேர்ந்து ஆட்டொவுல போணும்னா நாப்பது அம்பது ரூவாயாது ஆவும்' யோசித்தார்.

"தம்பி ரிக்சா வருமா?"

"எங்க சார்?"

"எக்மோர்."

"ஸ்டேசனுக்கா?"

"ம்."

"வாங்க."

அதுவரை சைக்கிள் ரிக்சாவிலேயே ஏறியதில்லை ஜேசுராஜன். துருபிடித்த பாகங்களில் எண்ணை வைத்து தேய்த்ததில் தீபாவளி காலையில் ஜட்டியுடன் சுற்றும் சிறுவர்களைப் போல ரிக்சா முழுவதும் எண்ணை வழிந்துகொண்டிருந்தது. ரிக்சாவின் இருக்கையில் போடப்பட்டிருந்த 'மெத்தை'யின் ஓட்டைவழியே தேங்காய் நார்த்தும்புகள் குத்திவிட்டதில் எரிச்சல் அதிகமானது. சில அரசு பேருந்துகளின் இருக்கைகளை நியாபகப் படுத்தியது. பார்க்க மெத்தைபோலத் தெரியும் ஒரு பொருள் இத்தனைத் திடமாக இருப்பது ஏமாற்றமளித்தது.

'விழாக் கமிட்டிக்காரனுவளுக்கு எவ்ளோ சொன்னாலும் புரியாது. ஆட்டோ செலவுக்கு காசு தந்தா என்னா? டொனேசனக் கொண்டு குடுத்தா மட்டும் வாயப் பொழப்பானுவ' நொந்துகொண்டார்.

"இன்னா வெயிலு சார்?" ரிக்சாக்காரர் உரையாடலை ஆரம்பித்தார்.

"ஆமாப்பா."

'இவனோடு என்ன பேசுவது?' சலிப்புடன் நினைத்தார் ஜேசுராஜன்.

"எங்க ஊர்ல நல்ல மழ." ஏதாவது பேசலாமெனத் தொடர்ந்தார்.

"இன்னா ஊரு சார்?"

"தூத்துக்குடி பக்கத்துல..."

"மைக்கேல்தாஸ் ஊரா நீங்கோ?"

"ஆமா. மைக்கேல்தாசத் தெரியுமா?"

"ஆமா சார். அவர் வீட்டாண்டதான் நம்ம குடிச கீது. எம்பொஞ்சாதி மைக்கில்தாஸ் வூட்லதான் வேலைக்குப் போவ்து. ஒரு பத்து வர்சமாத் தெரியும் சார். அல்லாரும் ஒரே கோயில்தானே."

"நீ க்ரிஸ்டீனா?"

"ஆமா சார்." கழுத்திலிருந்த செபமாலையை இழுத்துக் காண்பித்தான். அதில் நூல் முழுவதும் அழுக்காயிருந்தது. சில மணிகள் உடைந்திருந்தன. சிலுவையில் பாதியில்லாமல் இருந்தது. "பேரு சிலுவப்பிச்ச. மாதாக் கோயில்ல வெள்ளக்கார சாமியாரிருந்தப்பவே எங்க தாத்தாவெல்லாம் க்ரிஸ்ட்டீனாயிட்டாங்க."

ஜேசுராஜனுக்கு கொஞ்சம் சலிப்பாயிருந்தது. வெயிலா, சாக்கடை நாற்றமா, வாகனப் புகையா, விழாக்கமிட்டியா அல்லது சிலுவைப்பிச்சையா எனத் தெரியவில்லை, ஏனோ அவருக்கு எரிச்சலாயிருந்தது.

"இன்னும் எவ்ளோ நேரமாவும்பா?"

"ஒரு பாஞ்சு நிமிஷமாகும் சார்."

'பதினஞ்சு நிமிஷம்ணா ஆட்டோவுலேயே போயிருக்கலாமே?' யோசித்தார்.

"மைக்கில் தாச இன்னா விஷ்யமா பாக்காந்த சார்?"

"எங்க ஊர் மாதாவுக்கு தங்கக் கிரீடம் செய்யுறோம். நன்கொடை வாங்கலாம்ணு வந்தேன். மகராசம்பா மைக்கில,் அள்ளிக் குடுக்கிறாரே"

மைக்கில் தாசைப் பற்றிய பேச்சு அவருக்கு திடீர் உற்சாகத்தை தந்தது.

"மாதாவுக்கு தங்க கிரீடமா?" பீடியை பற்றவைத்துக்கொண்டு சிறிது இருமினான் சிலுவைப்பிச்சை.

"ஆமா. எங்க ஊர் கோயிலக் கட்டி 30 வருசமாவப்போது. அதுக்குத்தான். ஊருக்குண்ணா அள்ளிக் குடுப்பாரு மைக்கிள்தாஸ். எங்க ஊர்ல அவர மைதாஸ்னுதான் சொல்வோம்."

"மைதாஸ்னா?"

"மைதாஸ் தெரியாதா?"

"இதெல்லாந் தெரிஞ்சா எதுக்குசார் நானு ரிச்சாவ்ல கெடந்து சாவ்றேன்?"

"மைதாஸ் கதை தெரிஞ்சுட்டா கலெக்டர் வேலையா கெடைக்கும்?"

"சர்தான். கலாஞ்சுட்ட போ". சப்தமாய் சிரித்தான் சிலுவைப் பிச்சை. பேச்சின் சுவாரஸ்யத்தில் மூலத்தைக் குத்தும் எரிச்சல்கள் மறக்க ஆரம்பித்திருந்தன ஜேசுராஜனுக்கு.

"மைதாஸ்ண்றது ஒரு கதையில வர்ற ஆளு."

"ஓகோ."

"அவன் தொட்டதெல்லாம் பொன்னாகும்."

"எப்டி அது?"

"ஒரு தேவத மைதாசுக்கு என்ன வரம் வேணும்னு கேட்டுச்சாம்.. அவன் தான் தொட்டதெல்லாம் பொன்னாகணும்னு கேட்டானாம். அதுபோல சாதாரண ஒரு ஏழக் குடும்பத்துல பொறந்த மைக்கேல் தாஸ் இண்ணைக்கு இத்தன பிசினஸ், காரு பங்களான்னு கொடிகட்டி பறக்குறாண்ணா அவன் தொட்டதெல்லாம் பொன்னாகுதுண்ணுதானே அர்த்தம். இங்க்லீஸ்ல இத மைதாஸ் டச்னு சொல்வாங்க."

"நீ வாத்தியாரா சார்."

"ஹெட்மாஸ்டர்."

"அதான் சோக்கா கத சொல்ற. அப்பால என்னாச்சு?"

"ம். அப்புறம் என்னாச்சு மைதாஸ் தொட்டதெல்லாம் பொன்னாச்சு."

"என்ன கத பாத்தியா சார்? கஷ்டப்பட்டு ஒழச்சு சம்பாதிக்கிறமாதிரி எவ்னாவது கத எய்தி வெச்ருக்கானா சார். அல்லாம் ஏதோ மேஜிக்ல ஒசந்துரலாம்ணுதான் கத வெச்ருக்கான் சார்."

இப்படி ஒரு கோணத்தில் மைதாஸ் கதையை ஜேசுராஜன் நினைத்துப் பார்த்திருக்கவில்லை.

"நான் முழுசா ஒனக்கு கத சொல்லலியே? வரம் வாங்குன மைதாஸ் தோட்டம், வீடுன்னு எல்லாத்தையும் தொட்டான். எல்லாம் தங்கமாயிடுச்சு. இன்னும் இன்னும்ணு என்னவெல்லாம் அவங் கண்ல பட்டுச்சோ எல்லாத்தையுந் தொட்டான் எல்லாமே தங்கமாய்ச்சு. சந்தோசத்துல சாப்ட உக்காந்தான்."

"புரியுது சார்? சாப்பாட்ட தொடங்காட்டியும் சாப்பாடும் அப்டியே தங்கமாயிருக்கும்."

"ஆமா. சாப்பாடு தங்கமானா எப்டி சாப்டுறது? பட்டினியாயிருந்தான். அவன் பொண்டாட்டியத் தொட்டான் அவ தங்கச் செலையானா, அவன் மகளத் தொட்டான் அவளும் தங்கமாயிட்டா. அப்புறந்தான் மைதாசுக்கு வாழ்க்கையில எது முக்கியம்ணு தெரிஞ்சுது."

சென்னையின் சேரியிலிருக்கும் ரிக்சாக்காரனுக்கும் நல்லொழுக்கப் பாடம் சொல்லித் தந்ததில் பெருமிதம் கொண்டார் ஜேசுராஜன்.

கொஞ்ச நேரம் மௌனமானான் சிலுவைப் பிச்சை.

'ஹ்க்கும் ஹா' கிண்டலாய் சிரித்தான்.

"என்னப்பா சிரிக்க?"

"நீ சொன்னது சர்தான் சார்."

"என்னது?"

"மைக்கில்ராஜ் மைதாசேதான்."

"ஆமா சொன்னேன்ல. அவர் தொட்ட.."

"அதச் சொல்லலா சார். மைக்கில்தாஸ் ஒயிஃப் தெரியுமா?"

"ப்ரின்ஸ் டீச்சர். நல்லாவேத் தெரியும். அத்தப் பொண்ணத்தான் கட்டிப்பேன்னு கட்டிகிட்டாரு."

"ம். அந்தம்மா எப்டி செத்துச்சு?"

"தூக்கு போட்டுகிச்சு."

"எப்டின்னு தெரியுமா?"

அத்தனை விபரமாகத் தெரிந்திருக்கவில்லை ஜேசுராஜனுக்கு.

"பணம் இருந்த சூட்கேஸ் ஒண்ண எடுத்துப் போட்டு அதுக்குமேல ஸ்டூல வெச்சி தூக்கு மாட்டிகிச்சு."

"அப்டியா?"

"நாந்தான்சார் போலீஸ் வரக்குள்ள அந்தப் போட்டிய தூக்கிவச்சேன்."

ஊரில் கேள்விப்பட்டிருந்தாலும் சிலுவைப் பிச்சை சொல்வதை முழுவதாக நம்ப இயலவில்லை.

"அப்புறம் அவர் பொண்ண?" சிலுவை கேட்டான்.

"அவளுக்கு என்னாச்சு ."

"அவர் பொண்ண யாருக்கு கட்டிக் குடுத்தாரு தெரியுமா?"

"அற்புதம் டிராவல்ஸ் பையனுக்கு."

"அந்த நேரத்துல மைக்கில்தாஸ் பிசினஸ் படுத்துட்டதால அந்தப் பையனுக்கு கெட்டி வச்சாரு. காசு சார். காசு. அற்புதத்தோட பையன் ஊதாரி சார். மைக்கில்தாசுக்குந்த் தெரியும் ஆனா அற்புதம் பிசினஸ்ல பைசா போடுறேன்னு சொன்னாங்காட்டியும் கல்லாணம் நடந்துச்சு."

"ஓகோ."

"மாதா செல மாறி இருக்கும் சார் அந்தப் பொண்ணு. கல்யாணத்துக்கப்பால ஒரு நாகூட சந்தோசமாயில்ல சார். எம் பொஞ்சாதி எங்கிட்ட வந்து அழும்.

நீ சொன்னது சர்தான் சார். மைக்கில்தாஸ் மைதாஸ்தான். பணம் சேக்குறதுலேயே குறியா இருந்தான்.. குடும்பத்த முள்சா மறந்துட்டான்."

அதற்குப்பின் அவனோடு பேச இயலவில்லை ஜேசுராஜனால். சிலுவைப் பிச்சையும் தீவிர சிந்தனையில் மூழ்கியிருந்தான். வாகன இரைச்சலுக்கிடையே அவர்களுக்குள்ளிருந்த மௌனம் தெளிவாகக் கேட்டது.

"சார். ஸ்டேசன் வந்தாச்சு."

ரிக்சாவிலிருந்து இறங்கினார் ஜேசுராஜன்.

"எவ்வளவுப்பா?"

"வழக்கமா இர்வது ரூபா வாங்குறது. பாஞ்சு ரூபா தாங்க சார். ஒங்க ஊர் மாதாவுக்கு எம் பேர்ல 5 ரூபாய் டொனேசன்." சிரித்தான்

மைக்கிள்தாசின் ஐம்பதாயிரம் ரூபாய் செக் இருந்த கவர் கைப்பையில் இருக்கிறதா எனப் பார்த்துக்கொண்டார் ஜேசுராஜன். அந்த வெள்ளைக் கவரில் இருந்த அழுக்கு அப்போதுதான் அவர் கண்ணில் பட்டது.

============================================


நன்றி: திண்ணை

சிறில் அலெக்ஸ்